Formacion iniciala
APRENE, Establiment d’Ensenhament Superior, ric de 15 ans de recèrcas dins los domenis de la pedagogia e de l’immersion, prepausa una formacion completa, teorica e practica, per de joves que vòlon venir regents en occitan e que tenon a ensenhar dins aquesta lenga, al dintre de las escòlas Calandretas.
Un dispositiu de transmission del mestièr coerent : la mesa en responsabilitat progressiva de regentas e regents experimentats dins la menada e la validacion de las formacions es al còr del succès de nòstra formacion pedagogica. Los bailes, paissèls e paissèls ajudaires intervenon dins cada nivèl de la formacion, aculhisson, acompanhan, vesitan, ajudan e avaloran los estudiants-calandrins.
Una aisina de concepcion e de contraròtle : lo conselh scientific Correja d’APRENE se compausa d’universitaris, cercaires, regents e associatius. S’acampa dos còps l’an per, en ligam amb lo CA d’APRENE, validar e pensar los contenguts de las formacions.
Jurada : dintrar en formacion
La JURADA es l'examen dintrada a APRENE.
Ficha d'inscripcion a la Jurada de 2012
Las Calandretas son d’escòlas bilingüas ont la lenga ensenhanta es l’occitan. Los mainatges escolarisats a Calandreta son en majoritat d'ostals francoparlants. La problematica prepausada als regents de las Calandretas es de trasmetre la lenga occitana viva d'un biais natural en prepausant l'immersion tant completa coma possible a l'escòla. En mai de la lenga, trasmeton a l’uncòp la cultura d’òc.
La jurada a d’avisar:
* Lo nivèl de lenga dels candidats,
* Lor motivacion per far de l’ensenhament lo mestièr,
* Las competéncias fondamentalas e disciplinàrias que mestrejan.
La jurada se debana amb quatre espròvas escrichas e un entreten que forman una avaloracion iniciala. A partir d'aquela avaloracion, las federacions regionalas, en partenariat amb l'establiment APRENE decidisson dels candidats qu'intraràn en formacion per venir de regents(as) de las Calandretas.
LAS ESPRÒVAS ESCRICHAS
Occitan
Lo nivèl d'occitan requesit per dintrar en formacion es lo nivèl A2 del CECRL.
La Jurada prepausa una espròva escrita d'occitan amb una partida compreneson una partida produccion.
Durada de l'espròva : 3 oras
Nòta eliminatòria : 10/40
Coeficient : 2
Matematicas
Los candidats respondràn a d'exercicis :
* de calcul,
* d'algèbra,
* de conversions de mesuras,
* de proporcionalitat,
* de geometria,
* de logica.
Los candidats portaràn de material per la geometria, mas la calculeta es pas autorizada. Los candidats redigiràn en occitan. Senon seràn notats sus 15 ponches.
Durada de l'espròva : 2 oras
Nòta eliminatòria : 5/20
Coeficient : 1
Pensada
APRENE prepausa d'exercicis escriches ont cal redigir un tèxt estructurat en occitan. La question pausada s’apiejarà sus un o dos documents que tracta(n) de questions d’educacion e/o de lengas.
Son avaloradas :
* Las competéncias dels candidats per avisar mantun vejaire e argumentar dintre una problematica simpla mas plan pausada.
* La qualitat de la forma : plan, encadenament logic de las idèas.
* La culturala generala : las referéncias a d'autors o de pensaires, o encara a de corrents de pensadas, las citacions...
Durada de l'espròva : 1 ora 45
Nòta eliminatòria : 5/20
Coeficient : 1
Francés
A partir d'un tèxt o de mai d'un tèxt, qualques questions seràn pausadas. Los candidats i respondràn a l'escrich, en francés corrècte, qu'avaloram:
* lo nivèl de lenga escricha,
* la capacitat d'analisi,
* la capacitat de sintesi,
* la capacitat d'imaginacion.
Durada de l'espròva : 1 ora 45
Nòta eliminatòria : 5/20
Coeficient : 1
L'ESPRÒVA ORALA
L’entreten se debana la setmana que seguís l’escrich. APRENE convida los candidats concernits per corrièr electronic.
Prealablament a l’entreten, cada candidat realizarà, a partir d’una consigna escricha, un document demercé un logicial de tractament de tèxt. Aqueste document imprimit serà un dels supòrts de l’entreten.
Durada de l’exercici : 45 minutas.
L’establiment fornirà al candidat tot lo material informatic necessari.
La lenga principala de l’entreten es l’occitan. Lo mond de la jurada s’entretenon amb lo candidat per lo conóisser melhor. Durada de l’entreten : 45 minutas.
A1
ANNADA PREPARATÒRIA AL MESTIÈR
L’annada APRENE 1 es una annada preparatòria al mestièr ; sa validacion es indispensabla per ensenhar dins las escòlas Calandreta amb lo títol de Regenta o de Regent. Sa tòca es de far venir cada calandrin(a) al nivèl de competéncia B2 [1] en occitan e l’ajudar a se bastir una pedagogia biaissuda en classa. [2]
Per complir amb l’objectiu, cada calandrin(a) [3] en A1 viurà:
* Un modul d’almens 4 setmanas d’estagi acompanhat per un paissèl o un baile dins cadun dels 3 cicles del primièr gra e dins tres escòlas diferentas. I practicarà de preparacions de classa e de menadas de sesilhas o, se ne vira, de sequéncias. Participarà activament a las institucions de classa. Viura de projèctes pedagogics. Al cap de cada modul, lo paissèl o lo baile emplenarà una grasilha d’avaloracion.
* 11 estagis teorics a Besièrs ont aprendrà las competéncias teoricas de basa del mestièr. Participarà amai a 3 estagis d’afortiment de lenga.
* 3 setmanas d’abaudiment dins la classa d’un paissèl ajudaire.
* 7 setmanas de remplaçaments en responsabilitat de classa sens acompanhament ont començarà de tastar del mestièr en autonomia. I aurà doas vesitas de paissèls ajudaires que redigiràn un rapòrt de vesita a cada còp.
* 2 acamps associatius almens ont se presentarà al mond « en tant que calandrin(a) » e ont rescontrarà l’aspècte « s’associam per far escòla ». (cf ligam :http://calandreta.org/Carta-de-las-Calandretas.html)
Aital, al cap de l’annada d’A1, cada calandrin(a) aurà viscut una annada rica d’occitan, almens, dins quatre escòlas Calandretas diferentas, mantuna setmana de vida de classa e d’escòla dins una amira professionala. Aurà tastat de la realitat del movement associatiu de las Calandretas. Sauprà preparar la classa (ficha menaira de sesilha, quasèrn de bòrd), far una leiçon en tot pausar un objectiu, avalorar los aquesits dels calandrons mercés un dispositiu d’avaloracion formativa, montar un emplec del temps de classa, organizar una sortida e alestir un projècte pedagogic, pensar sa classa amb las aisinas e las institucions adaptadas. Serà capable de portar la lenga occitana de longa, tant a l’oral coma a l’escrich, sens trantolar.
[1] Nivèl definit dins lo Quadre Europèu Comun per las Lengas
[2] En referéncia a la Carta de las Calandretas adoptada lo 21 de mai de 2005 a Limos.
[3] Estudiant en formacion a APRENE
A2
APRENE 2 es una annada de mesa en pòste dins una classa Calandreta per una confirmacion de capacitat professionala. Serà validada amb de vesitas de classa, la seguida del trabalh a prepaus del referencial de competéncias e d’escritura pedagogica. Sens validacion d’aquela annada A2, serà pas possible de perseguir lo cursus.
Dispositiu d'acompanhament e de validacion de l'annada A2
Constatam que lo cursus de formacion iniciala dels regents es dempuèi dos ans somés d'un latz al renfortiment del costat universitari de la formacion dels regents (la masterizacion) sovent alunhat de la practica professionala, e d'autra part als cambiaments del concors de recrutament dels Professors de las Escòlas, encara mens adaptat per clavar una fin de formacion professionala.
Las nòstras escòlas, e los calandrons, an de besonh de mèstres formats dins l'amira de la carta de las calandretas, çò qu'assegurèm dempuèi d'annadas amb lo cursus de formacion, que comença per l'annada A1.
Pasmens, dins lo nòstre dispositiu, aviam pas previst de validacion d'una responsabilitat longa de classa.
Es per tot aquò qu'a la darrièra AG d'APRENE, decidiguèrem lo principi d'afortir la formacion al mestièr de la seconda annada de formacion iniciala dels mèstres.
Per çò far, lo CA d'Aprene de Julh 2011 decidiguèt un dispositiu d'acompanhament e d'avaloracion de l'annada A2, dins tres domenis : pedagogia, lenga e vida associativa.
La competéncia de validacion del dispositiu es partejada entre APRENE e las Federacions Regionalas 1
Lo seguit de las regentas en A2 concernís las calandrinas que validèron l'A1 en julh de 2011.
APRENE
- doas vesitas de classa :
La primièra vesita es prevista en debuta d'annada segon una grasilha especifica.
Còps que i a lo paissèl A2 podrà far la vesita amb un paissèl ajudaire.
- lo paissèl de A2 :
Sa tòca serà d'ajudar, de seguir, de respondre a las questions, de far de ponches regulars.
Organisarem 2 conferéncias telefonicas (o video) dels paissèls de A2, una apuèi la vesita 1, e una abans la vesita 2.
Cada regenta A2 podrà causir son paissèl, demèst los paissèls e paissèls ajudaires de A1, o los de las annadas passadas.
Las regentas A2 faràn passar sos vòts a APRENE, permetrà d'establir la tièra dels paissèls.
- Un estatut reconegut :
La regenta A2 a lo drech encara de saber pas, o de saber pas far. Li cal demandar d'ajuda e pausar de questions. Sovent, las dificultats naisson del silenci e de l'amagat...
- Un espaci d'escritura :
Servarem un espaci dedicat a de nòtas e de tèxtes sus Agora projèct. Los paissèls e paissèls ajudaires seràn cargats de far resson.
(fichas menairas e fichas descriptivas...)
- La referéncia a las 11 competéncias exigidas d'un ensenhaire dins las escòlas immersivas de la Republica Francesa.
- L'exigéncia al prepaus del nivèl de lenga per validar l'annada d'A2 dèura èsser lo nivèl C1 del quadre europenc de referençament de las lengas. Per aquesta annada, APRENE adaptarà aquela exigéncia.
Federacions regionalas
Una de las missions prigondas de las federacions regionalas es la gestion dels pòstes dels regents, fòra o jos contract, per fin de compausar còlas ensenhairas coerentas e de biais, capablas de metre en òbra la carta de las Calandretas.
Cada federacion ne demòra garanta cap als parents.
Per metre en òbra lo dispositiu A2, de biaisses diferents de far son possibles.
Cada federacion regionala causirà un biais per seguir, se metre a l'escota, e acompanhar los A2 en responsabilitat de classa, dins l'amira d'ofrir a l'A2 un agach complementari a lo d'APRENE, noirit a l'associacion, al viscut de la còla, dels parents, e dels delegats de regents, a prepaus de son activitat, sa qualitat e son environament de trabalh, dins una tòca de reconeissença de cadun, e de balhar a la federacion d'elements per dobrir de questionaments e permetre de trasmetre de suggestions a APRENE.
La validacion de l'annada A2 serà prononciada a l'acamp del Conselh d'Administracion d'APRENE debuta de julhet.
La Confederacion de las escòlas Calandreta pòt far relais se la federacion regionala s'estima pas pro afortida.
Master APRENE-ISLRF/UPVD
MASTER Educacion Formacion APRENE / ISLRF Ensenhament bilingüe immersiu
Aquela formacion, menada per APRENE e l’ISLRF en partenariat amb l’Universitat de Perpinhan Via Domitia, permetrà en dos ans de completar e apregondir la formacion pedagogica e lingüistica dels estudiants e de los preparar al concors del CRPE.
La pre-inscripcion a l’ISLRF es obligatòria,
Pels candidats qu’an ja validat son annada APRENE 1, l’annada de Master 1 serà amenatjada per lor permetre de la far per correspondéncia del temps que son en pòste de regent. Los corses e examens seràn organizats lo mai possible en coeréncia amb l’annada escolara. Regroparem los corses en presencial en 4 seminaris d’una setmana cadun.
Dins las unitats d’ensenhament i aurà tanben la preparacion al concors de recrutament de professors d’escòlas.
A3 PEE
FORMACION INICIALA CONTINUADA
APRENE assegura a los que capitan lo concors una formacion adaptada. Los qu’an capitat lo concors auràn l’estatut de PEE (Professors d’Escòla Estagiaris) pendent un an e seguiràn d’estagis per los ajudar a preparar l’inspeccion e per aprigondir la practica de classa, amb l’ajuda dels paissèls ajudaires. Faràn tanben un vertadièr trabalh de cèrca personala e d’escritura per presentar un trabalh de fin de formacion iniciala. Escriuràn tanben a prepaus de las 11 competéncias professionalas dels ensenhaires (las 10 del sòcle comun, amai la onzena, a prepaus de l’immersion).
Annada PEE 2011-12
A -Lo «sens» d'aquesta annada :
Dempuèi l'AG passada d'APRENE, dos « pilars transversals » seguisson la formacion tota : referencial de competéncias e dispositiu escritura.
S'articularàn naturalament amb las exigéncias de la validacion de PEE dins lo trabalh d'ongan : clavar la formacion iniciala, cavar las tecnicas, los biaisses pedagogics, e los ponches de questionar.
B -L'encastre, lo calendièr :
* PEE - J1 dimars 30 d'agost de 2011
* Jornadas Escapolaire
- dimècres 28 de setembre de 2011
- dimècres 16 de novembre de 2011
- dimècres 14 de decembre de 2011
- dimècres 7 de març de 2012
- dimècres 4 d'abril de 2012
* Estagi 1 del diluns 14 al divendres 18 de novembre de 2011
Observacion dins una classa
* Estagi lenga del dijòus 23 al dissabte 25 de febrièr de 2012
Estagi Melhorar la lenga – Castras
* Estagi 2 del diluns 27 de febrièr al divendres 2 de març de 2012
Estagi Mistral e Freinet – Provença
* Estagi 3 del diluns 23 al dimècres 25 d'abril de 2012
Estagi Tradicion e imaginari a l'òbra dins la ciutat – Pesenàs
del dijòus 26 al divendres 27 d'abril 2012
2 jorns a APRENE
* Estagi 4 del diluns 14 al divendres 18 de mai de 2012
2 jorns a APRENE + Congrès
Las estagiairas PEE seràn remplaçadas del temps dels 4 estagis.
Se deuràn far ajudar dels caps d'establiments per trapar aqueles remplaçants.
C- Lo dispositiu de validacion :
un tutor es designat per APRENE demèst los paissèls ajudaires, acompanharà l'estagiari PEE.
Una primièra vesita, amb lo cap d'Establiment se farà en octòbre, una segonda dins l'annada.
Lo tutor deurà signar lo rapòrt per validacion. Aqueste rapòrt ten compte de las 11 competéncias.
Lo cap d'Establiment signa el tanben un rapòrt.
APRENE demandarà una inspeccion de validacion finala.
Un trabalh serà de tornar pel mes de mai, que podrà « seguir » las doas memòrias (M1 e M2) per recampar, tirar de fials...
O alara una realisacion escricha (+ fotos, videos), a prepaus de la practica de classa (coma una balisa dins un caminament).
La PEE causirà demèst las dralhas seguentas :
1.un trabalh analitic : dos o tres elements desseparats, en resson per ne tirar un analisi.
2. un ipotèsi – la pausar - causir un escantil de mainatges (los questionar o lor far far una produccion) – mesurar los resultats e tirar de conclusions.
3. centrar cap a un subjècte son viscut en classa.
4. realizar quicòm amb los mainatges (participacion directa o indirecta)
en ligason amb la formacion continua, o l'un dels sectors d'APRENE.
La tòca finala es cooperativa: aqueste trabalh deu poder servir als autres.
D-Un estagi per anar veire una autra classa :
L'estagi 1 serà consacrat a una observacion dins una classa, causida en discutida amb APRENE e lo tutor, segon lo projèct endralhat.
Concors
Descripcion del concors [4] :
ESPRÒVAS D’ADMISSIBILITAT
* Espròva n°1 : francés, istòria-geografia
* Espròva n°2 : matematicas, sciéncias e tecnologia
* Espròva n°3 : comentari guidat d’un tèxte en occitan e revirada d’un extrach d’aquel tèxte
ESPRÒVAS D’ADMISSION
* Espròva n°1 : presentacion d’una preparacion de sesilha en matematicas, e interrogacion en Arts visualas, o musica, o EPS
* Espròva n°2 : presentacion d’una preparacion de sesilha en francés e interrogacion sus la competéncia «agir en fonctionnaire de l’Etat et de façon éthique et responsable»
* Espròva n°3 : entreten amb la jurada a partir d’un document sonòr o escrich autentic relatiu a la cultura occitana
Per venir professor d’escòla titular(a) dins una classa Calandreta en contracte d’associacion amb l’Estat, cal que lo(a) regent(a) aja l’annada APRENE1 e l’annada APRENE2 de validadas, e un diplòma de Master 2 d’una universitat. Calandreta recomanda al mond d’aver lo diplòma de Master 2 MEF-EBI de l’ISLRF/UPVD.
[4] Arrestat del 28 de decembre de 2009, JO del 6 de genièr de 2010.
Bailes, Paissèls e Paissèls-ajudaires
Referencial Baile, Paissèl, Paissèl Ajudaire
Lo Baile
- Aculhís un calandrin dins sa classa, lo presenta als mainatges e l’acompanha temps de las quatre setmanas de son modul.
-
Pren de temps per l’escotar e respondre a sas questions.
-
Son biais de portar la lenga fa referéncia.
-
Li demanda de preparacions escrichas, e las agacha. Aconselha.
-
Balha son vejaire al calandrin per que melhore sa practica de classa. Li ditz çò que va plan, çò que cal melhorar o sustot çò que cal cambiar de sa practica de classa.
-
Lo baile e lo calandrin son de longa en classa, levat per un conselh de paissèl o una formacion bailes, se ne vira.
-
Lo baile deu verificar se lo calandrin emplena regularament son quasèrn caminaire
-
Lo calandrin a de respectar lo baile, la classa, los mainatges. Reciprocament, lo baile respècta lo calandrin. Lo calandrin parla pas de la classa en defòra. Pasmens, s’apiejarà sus son viscut en modul per noirir d’analisis que se practican en còla a APRENE.
-
En mai d’aquò, en estagi a Besièrs, lo calandrin escambiarà amb sa còla a prepaus de la vida de classa, de las practicas, de Calandreta en general, del projècte tot…
-
Fòrça important : lo baile emplena la grasilha de fin de modul e la mòstra al calandrin en la comentar. Aqueste document es fòrça important, qu’es pegat dins lo libreton del calandrin e que demorarà. Aquela grasilha acompanha la formacion e las melhoranças del calandrin mas a una vertadièra fonccion avaloranta. Atencion, la granda dificultat es d'escriure çò que va pas o çò que lo calandrin fa pas plan del vejaire del baile. Pasmens, es indispensable.
-
En cas de dificultat, lo baile se pòt sarrar del paissèl del calandrin o d'un paissèl ajudaire.
Lo Paissèl
En mai de çò que fa lo baile :
-
Es una referéncia per la lenga occitana e son biais de la trasmetre als mainatges.
-
Participa als acamps de paissèls.
-
Participa al congrès o als acamps del movement Calandreta.
-
Seguís lo calandrin tot al long de l’annada.
-
Es disponible per li parlar, quitament al telefòn.
-
Sap li dire las causas malaisidas.
-
Coneís e respecta menimosament los luòcs de paraula.
Lo Paissèl-ajudaire
- Es portaire de l'occitan, n'a lo lagui e lo vòl qualitatós.
- Coneís, emplega plan la lenga, n’es portaire, cèrca de la melhorar de longa.
-
Coneís plan lo projècte Calandreta.
-
Respècta la Carta de las Calandretas, participa als congrèses, als acamps e a l’anar del movement a son nivèl. Respècta los luòcs.
-
Coneís mai d’una Calandreta, escàmbia a prepaus de sa practica de classa.
-
A d’experiéncia de la classa : es titular e ensenha dempuèi d' annadas.
-
Participa a las formacions de paissèls ajudaires, capita de parlar de sas practicas de classa
-
capita de redigir los renduts de vesitas de classas, amb respècte mas en saupre formular çò que va e çò que va pas
-
s'encamina cap a de responsabilitats pedagogicas dins l'encastre de la formacion iniciala o continua.
-
A una experiéncia de paissèl. Sap reçaupre un calandrin dins sa classa. Sap ajudar un calandrin. Ne sap parlar en acamp de paissèls, prigondament e finament, mercé un biais plan professional de s’exprimir, mas en tot respectar la persona.
-
Respècta los luòcs de paraula e sas règlas, n’aplica las decisions.
Los paissèls ajudaires prepausan a la còla correja, segon los besonhs e las situacions, una tièra de paissèls e bailes per l’annada escolara e una còla de paissèls ajudaires.
Fraisses escolaritat - Ajudas
Fraisses d'escolaritat
Los dreches d'inscripcion al Master son de pagar a l'ISLRF e son determinats per l'universitat jos convencion amb l'ISLRF.
Pas de dreches d'inscripcion suplementars a l'establiment APRENE
Ajudas
Estatut estudiant :
APRENE a una abilitacion permanenta del ministeri de l'Educacion Nacionala per obténer de borsas de l'ensenhament superior. Los dorsièrs deuràn èsser despausats al prèp del CROUS segon las proceduras costumièras.
http://www.crous-montpellier.fr/
APRENE a tanben l'abilitacion per la seguretat sociala estudianta.
Dempuèi 2011, Lo conselh regional Aquitània e lo conselh regional Miègjorn-Pirenèus prepausan una ajuda individuala destinada als estudiants que preparan los masters d'ensenhament bilingües francés-occitan ; aquela ajuda financièra se presenta jos la forma d'una borsa pel mond que s'engatjan a ensenhar puèi pendent 5 ans dins una classa bilingüa de la region concernida.
http://www.aquitaine.fr/politiques-regionales/culture/langues-et-cultures-regionales.html
http://www.midipyrenees.fr/Les-bourses-Ensenhar
Estatut d'estagiari de la formacion professionala / beneficiari d'una allocacion de pèrda d'emplec :
Mercé l'activitat anteriora, es possible de beneficiar d'ajuda per la formacion /(PAP/AISF = Projet d'action personnalisé / Attestation d'inscription à un stage de formation/). Mai d'entresenhas al pòl emplec.